الادب والفن

مش جايز احلام؟

كلمات الشاعر:

عادل عدلي راغب

شئ مش مسبوق
وضع كأنه م السيما مسروق
كله قاعد ف البيت مخنوق
والناس محتارة ومش فاهمة
مش عارفين امتي الحال هيروق
من اسبوع بس
كانت كل أمورنا عادية
كانت دنيا غير الدنيا
ننزل ونروح
نكدب ونبوح
نكره ونحب بحرية
نزهق بطريقه طبيعية
من اسبوع بس
من غير ما نحس
زي مانكون انصبنا بنحس
او باللعنة الفرعونية
كل العالم بقي بيحارب
والبشرية ف نفس القارب
وماحدش هيقول مش لاعب
دي اللعبة صبحت دولية
لعبة أخرتها حياة او موت
نلعب بسكوت
حابسين انفاسنا من غير صوت
وعملنا لحياتنا ميوت
يمكن خايفين؟
فيه ناس م الخوف وحده بتموت
وصبحنا نعّد ف ارقام
كام ماتوا وكام خفوا من كام
واختلطت في دماغنا الايام
نصحي ونستني امتي ننام
نصحي ونتمني الدنيا تعود
زي ما كانت
ونقول هانت
كلها أسابيع زي ماقالوا
لا هيفضل الحال علي حاله
ولا فيه وضع بيفضل ثابت
او مثلاً جايز في الآخر
نصحي وننام
قوم يطلع كل ده كان أحلام !

٢١ مارس ٢٠٢٠

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

إغلاق